SAGIDEK LATTA TI KIDAY, WWW.RFAAFIL.COM

SAGIDEK LATTA TI KIDAY, WWW.RFAAFIL.COM
Daniw ni Sumasaludo
4th Prize, Reader’s Choice Award

i
sagidek latta ti kiday, www.rfaafil.com
ngamin awan sarday dagiti imam a mangisaruag
tabukol ti obra maestra iti karayan ti literatura Ilokana
a mangpikar iti agayus a pluma ni saluyot
wen, adu latta ti makalapam a mangraman
iti nabagas a tema nga inyappanmo
ta pinutar ni Bucaneg ‘ta pusom.
awan iti lagip ti pinapel a sukat dagiti gameng
a rummuar iti nadumaduma a pluma
ngamin nairut ti arakupyo ken ni Lam-ang.
ii
sagidek latta ti kiday, www.rfaafil.com
ngamin adu a puso ti sumrek
a mangmingming balitok a letra ken imahen
a nakapaskil iti nadaeg a pagtaengam
kasta met a nakalukat latta ti agpitik a tawa ken ridawmo
idasaram latta ida iti agkakaimas a potahe:
daniw, sarita, salaysay, nobela, ken dadduma pay
makita dagiti ngipenda a rumuar
ket agsublidanto manen ta saan a pandagan ti sensilio
ti kada minuto a panagiggem iti mouse
ti ipadigom kadakuada a labahas ti utek.
MAKAULAW TI ANGOT TI NAMAGA NGA ASUK A BINATOK TI GURRUOD

i ulaw
inartapanen ti maruam ken di agnakem a dulluog parasipis ti danum
agulser ti tiklis iti pasugnod kabsat ni pandaca pygmea
idinto a maulaw bagis ti masakbayan iti ipas ti sabidong.

ii angot
misuotan ti angin ti panes nga aruyot ti Payatas a tikkab dagiti barong
pikarenna asug bituka dagiti dulpet. kidemanda lattan giteb ni diarrhea
ta piman limsot ni Mabini a tedda ni tuyo iti umis-isem a bolsa.

iii namaga
nagrikki ti paraangan ti bunton a kinalbo dagiti butiog nga alingo
agkurno ti matalimudaw a puon ti balitok a merienda ni saluyot
idinto a mawaw iti linnaaw ti tubo a dalan ti nakartib a bagas.

iv asuk
sullatan ti ubing a buteg ti nangisit nga agong ti uttot dagiti balay
ti plastik ken kemikal, impierno a kaingin ken tambutso ti higante a tuwato
agrarek met ti anges dagiti nakatanggaya nga ima iti pay-od kabsat ni pag-ong.

v batok
naimatangam kaki a lua ti Candaba, Calumpit ken Dampalit
agtungtunglab ti masakbayan suli ti Paniqui, San Miguel, ken Carranglan
idinto nga agkukurrot dagiti gumawgawawa a kuton ti evacuation center.

vi gurruod
marba ti tambor iti kada umagek nga atis iti baet dagiti biblia ken koran
singaen ti pukkaw dagiti nabartek a botelia ti ulimek subo da silaw, adigi ken subual
matitileng met ti agad-adal ken mangopisina a bolpen iti ungor ganggannaet a makinaria.

vii
a, no di latta aglupos ni Ari Sukir ken dagiti pasurotna agsublinto ti puli ni Marce.