PANAGTURPOS

PANAGTURPOS
Rimmuar iti Iluko.com idi Disiembre 2003

Matnag linnaaw ti ragsak
Nupay agtukiad ti barukong
Pannakasinasina; pannakalungnguop
Bin-i iti uneg sako ti adal
Kalpasan pannakaibilag semento ti sirib.
Nasken tapno mapasingkedan
Naipasagepsep iti panunot;
Saanto nga eppes-agngatangata.
Addanto agdisso iti pilaw
Addanto pay agdisso iti turod ken karuotan
Ti dadduma, agdisso iti bangir a kelleng
Ti sabali, agdisso iti nagtaudanna.

Kalpasan tallo bulan; tawen
Pannakigubal tikag-ling-et
Tuok agpatnag; arbis-nam-ay
Kasta met ti layus-panagsagaba
Luktan ti isip ti kalman
Ket agsubli ti puso
Iti pannakilangen ti dawa
Iti danag pannakasubok panunot
Ken iti bannog-kamakam ti obligasion.

Iti pannakabayo ti kasasaad
Agdadasig dagiti bagas
Apirasen manen ti angin ti dawa iti katawa
Maep-ep bara ti iliw; awanen ti bannog-danag
Ngem agtig-ab ti puso
Iti pannakaani-pannakaummong
Iti sako ti alumni homecoming.