KARAYAN WANGAG: LAMINA DAGITI ADIGI TI GAMPAO

KARAYAN WANGAG: LAMINA DAGITI ADIGI TI GAMPAO
* Maikadua a Gunggona
On-the-spot poetry writing contest
GUMIL Filipinas/Cagayan Literary Seminar Workshop
February 7-8, 2004, Brgy. Pateng, Gonzaga, Cagayan
* Rimmuar iti Iluko.com
* Naipablaak iti Rimat Magazine idi Nobiembre 2004


Agayus ket agayusto latta kenka ti danum a lamina
Ti nasin-aw a tarigagay dagiti adigi iti sirok ti rangtay
Nga ima dagiti naputar ken maputarto pay a lasag
A manggaw-at iti sumingising nga init.

Adunto latta ti sumarungkar dita barukong
Nga adan ken eba ti sabali a kelleng
A mangbatok iti adalem a sirmata;
Mangunor kadagiti uged ti obra maestra
Dagiti timon a nangsaklot kenka
Ken dagiti babassit ken dadakkel nga anges.

Wen, agayusto latta kenka ti danum
A lamina dagiti adigi ti *Gampao

*Gampao – maysa pay a nagan ti Gonzaga (Cagayan)